real Life Stories Ghost 👻

     aadhunik samay mein bhoot-pret 

andhavishvaas ke prateek ke roop mein dekhe jaate hain par kuchh log aise bhee hain jo bhoot-preton ke astitv ko nakaar nahin sakate. kuchh log (padhe-likhe) jinhen bhoot-pret par poora vishvaas hota hai ve bhee in aatmaon ke astitv ko nakaar jaate hain kyonki unako pata hai ki agar ve kisee se in baaton ka jikr kie to saamane vaala bhee (chaahen bhale in baaton ko maanata ho par vah) yahee bolega, "padhe-likhe hone ke baad bhee, aap ye kaisee baaten kar rahe hain?" aur is prashn ka uttar dene aur logon ke saamane apane ko ganvaaroo samajhe jaane se bachane ke lie log in baaton ka jikr karane se bachate hain. jee haan, yah pooree sachchaee hai. aaj bhoot-pret ke astitv par prashnachihn to lag gaya hai par phir bhee vishv ke anek hisson mein aae din bhoot-pret sambandhee koee-na-koee romaanchak, avishvasaneey ghatana jaroor sunaee de jaatee hai. yahaan tak ki vikasit deshon, pooree tarah se vigyaan ke varchasv ko maanane vaale deshon mein bhee aisee ghatanaen sunane mein aa hee jaatee hain aur in rahasyamay ghatanaon par se vigyaan bhee parada nahin utha paata. khair main bhee to bhoot-pret ko nahin maanata par kabhee-kabhee kuchh aisee ghatanaen ghat jaatee hain ki bhoot-pret ke astitv ko nakaarana banaavatee lagata hai. gaanv-javaar mein to mainne bhoot-pret sambandhee bahut saaree kahaaniyaan, ghatanaen sun rakhee hain, par use kaise nakaar sakata hoon, jo mere saath bhee ghatee ho. kuchh aisee ghatanaen, jinhen main nakaar nahin sakata. aaj bhee in ghatanaon ke yaad aate hee mere rongate khade ho jaate hain.

aaie, ab bina der kie, bina aap sabako bhoomika mein ulajhae, ek ya do ghatana suna hee deta hoon. jee haan, aap ise manoranjan ke roop mein le, kaalpanikata kee upaj maanen aur main bhee inhen apane man ka bhram maan leta hoon taaki vigyaan kee duhaee deta rahoon.

baat koee 16-17 saal pahale kee hai. main jis jagah par kaam karata tha vaheen paas mein ek phlait kirae par liya tha. is phlait mein main akele rahata tha, haan par kabhee-kabhee koee mitr-sambandhee aadi bhee aate rahate the. choonki, is shahar mein hamaare gaanv-javaar ke kaaphee log hain to baraabar koee na koee aata-jaata hee rahata tha. is phlait mein ek bada-sa haal tha aur isee haal se juda ek baatharoom aur rasoeeghar. ek chhote se parivaar ke lie yah phlait bahut hee achchha tha aur is phlait kee sabase khaas baat yah thee ki yah pooree tarah se khula-khula tha. main aapako bata doon ki is phlait ka haal bahut bada tha aur isake pichhale chhor par seese jadit daravaaje lage the jise aap aasaanee se khol sakate the. par main is haal ke pichhale bhaag ko bahut kam hee kholata tha kyonki kabhee-kabhee bhoolabas agar yah khula rah gaya to bandar aadi aasaanee se ghar mein aa jaate the aur bahut saara saamaan idhar-udhar kar dete hai. itana hee nahin, phtail mein saanp aadi ke aane ka dar bhee bana rahata tha. aap soch rahe honge ki bandar, saanp aadi kahaan se aate honge to main aap logon ko bataana bhool gaya ki yah hamaaree bilding ekadam se ek sunasaan kinaare par thee aur isake agal-bagal mein bahut saare jangalee ped-paudhe, jhaadiyaan aadi theen. is phlait mein se neeche jhaankane par saanp aadi jaanavaron ke darshan hona aam baat thee.

ek din saam ke samay mere gaanv ka hee ek ladaka jo usee shahar mein kisee doosaree kampanee mein kaam karata tha, mujhase milane aaya. mainne usase kaha ki aaj tum yaheen rook jao aur subah yaheen se dyootee chale jaana. par usane kaha ki meree dyootee subah 7 baje se hotee hai isalie mujhe 5 baje jagana padega aur aap to 7-8 baje tak soe rahate hain to kaheen main bhee soya rah gaya to meree dyootee nahin ho paegee. is par mainne kaha ki koee baat nahin. ek kaam karate hain, chaar baje subah ka elaarm laga dete hain aur toon jaldee se jagakar apane lie tiphin bhee bana lena par haan ek kaam karana mujhe mat jagaana. isake baad vah rahane ko taiyaar ho gaya. raat ko kha-peekar lagabhag 11.30 tak ham log so gae. ham donon haal mein hee soe the. main ek patalee khaat par soya tha aur vah ladaka lagabhag mere se 2 meetar kee dooree par chattaee bichhaakar neeche hee so gaya tha. khair haal mein jeero vaat ka ball jal raha tha. darasal raat ko sote samay pratidin main jeero vaat ka balb jalaakar hee sota tha.

achaanak lagabhag raat ke do baje meree neend khulee. yahaan main aap logon ko bata doon ki vaastav mein meree neend khul gayee thee par lete-lete hee meree najar kichan ke daravaaje kee or chalee gaee. are, main kya dekhata hoon ki ek vyakti kichan ka daravaaja kholakar andar gaya aur main kuchh boloon usase pahale hee phir se kichan ka daravaaja dheere-dheere band ho gaya. mujhe isamen koee hairaanee nahin huee kyonki mujhe pata tha ki gaanvavaala ladaka dyootee ke lie let na ho is chakkar mein jaldee jag gaya hoga. bina gaanvavaale bachche kee or dekhe hee ye sab baaten mere dimaag mein uth rahee theen. par are yah kya, phir se, achaanak kichan ka daravaaja khula aur usamen se ek aadamee nikalakar baatharoom mein ghusa aur phir se baatharoom ka daravaaja band ho gaya. ab to mujhe thoda gussa bhee aaya aur choonki vah gaanv ka ladaka rishte mein mera ladaka hee lagata hai isalie mainne ghadee dekhee aur usake bistar kee or dekhakar gaalee dete hue bola ki bete abhee to 3 bhee nahin baje hain aur toon jagakar khatar-patar shuroo kar diya. are yah kya, itana kahate hee achaanak mere dimaag mein yah baat aaee ki main ise kyon bol raha hoon, yah to soya hai. jee haan, vah ladaka gaharee neend mein vaheen neeche apanee jagah par soya hua tha.

ab to main phataak se khaat se utha aur daudakar us bachche ko jagaaya, vah aankh malate hue utha par main use kuchh batae bina sirph itana hee poochha ki kya toon 2-3 minat pahale jaga tha to vah bola nahin to aur vah phir se so gaya. ab mere samajh mein kuchh bhee nahin aa raha tha, mainne haal mein lage tyoob ko bhee jala diya tha ab poore haal mein poora prakaash tha aur meree najaren ab kabhee baatharoom ke daravaaje par to kabhee kichan ke daravaaje par theen par kichan aur baatharoom ke daravaaje ab pooree tarah se band the. ab main himmat karake utha aur dheere se jaakar baatharoom ka daravaaja khola. baatharoom chhota tha aur usamen koee nahin dikha isake baad main kichan ka daravaaja khola aur usamen bhee lage balb ko jala diya par vahaan bhee koee nahin tha ab main kya karoon? neend bhee ekadam se ud chukee thee aur shareer mein kanpakanpee bhee shuroo ho gaee thee. itana hee nahin, saansen bhee ab rukane ka naam nahin le rahee theen. mujhe kuchh bhee samajh mein nahin aa raha tha aur man hee man mainne hanumaan chaaleesa padhana shuroo kar diya tha.

is ghatana ka jikr mainne kisee se nahin kiya. mujhe laga yah mera vaham tha aur agar kisee ko bataoonga to koee mere phlait mein bhee shaayad aane mein darane lage. jee haan, bahut kuchh dimaag mein chal raha tha, is ghatana ke baad se.

is ghatana ko beete lagabhag 1 maheene ho gae the aur raat ko phir kabhee mujhe aisa anubhav nahin hua. ek din mere gaanv ke do log hamaare paas aae. unamen se ek ko videsh jaana tha aur doosara unako chhodane aaya tha. ve log raat ko mere yahaan hee rooke the aur us raat main apane ek ristedaar se milane chala gaya tha aur raat ko vaapas nahin aaya tha.

subah-subah jab main apane room par pahuncha to ve donon log taiyaar hokar baithe the aur mera hee intajaar kar rahe the. aisa lag raha tha ki ve bahut hee dare hue aur udaas hon. mere aate hee ve log bol pade ki ab ham log ja rahe hain. mainne un logon se poochha ki phlait to kal hai to aaj kee raat aap log kahaan thaharenge? unamen se ek ne bola ki rod par so lenge par is kamare mein nahin rahenge. are ab achaanak mujhe 1 maheena pahale ghatit ghatana yaad aa gaee. mainne socha, to kya in logon ne bhee is phlait mein kisee ajanabee (aatma) ko dekha? yah baat yaad aate hee mere roen phir se khade ho gae.

mainne un logon se poochha ki aakhir baat kya huee, to unamen se ek ne kaha ki raat ko koee vyakti aakar mujhe jagaaya aur bola ki kampanee mein chalate hain. mera pars vaheen chhoot gaya hai. phir main thoda dar gaya aur isako bhee jaga diya. isane bhee us vyakti ko dekha, vah dekhane mein ekadam seedha-saadha lag raha tha aur shaaleen bhee. ham log ekadam dar gae the kyonki hamen vah vyakti isake baad kichan mein jaata hua dikhaee diya tha aur usake baad phir kabhee kichan se baahar nahin nikala aur hamalogon ka dar ke maare bura haal tha. hamalog raatabhar baithakar hanumaan ka naam japate rahe aur us kichan ke daravaaje kee or takatakee lagaakar dekhate rahe, par ab to subah bhee ho gaee hai aur vah aadamee abhee tak kichan se baahar nahin nikala hai. 

ab to main bhee thoda dar gaya aur un donon ko saath lekar tejee se kichan ka daravaaja khola par kichan mein to koee nahin tha. haan, par kichan mein gaur se chhaanabeen karane ke baad hamane paaya ki kuchh to gadabad hai. jee haan, darasal phrij kholane ke baad hamane dekha ki phreej mein lagabhag jo 1 kilo tamaatar rakhe hue the ve gaayab the aur tamaatar ke kuchh beej, ras aadi vaheen neeche gire hue the aur isake saath hee kichan mein ek ajeeb gandh phailee huee thee.

khair pata nahin yah ham logon ko vaham tha ya vaastav mein koee aatma hamaare room mein aaee thee. mainne isase chhutakaara paane ke lie us phlait ko hee badal diya aur doosare bilding mein aakar rahane lage.

chalie, ab doosara vrtaant phir kabhee, kyonki is samay mere roen khade ho gae hain aur shareer mein thodee see siharan bhee lag rahee hai. jay-jay. krpaya yag ghatana mera vaham bhee ho sakata hai, ise aap kaalpanik samajhen aur manoranjan ke roop mein len. phir se jay-jay. jay-jay bajarang balee.